Mama Dot warns against an Easter rising

Doan raise no kite is good friday
but is out he went out an fly it
us thinkin maybe dere wont be a breeze
strong enouf an widout any a we to hole it
fo him he'd neva manage to get it high-up
to de tree top ware de wind kissin
de ripess sweetess fruit we cawn reach
but he let out some string bit by bit
tuggin de face into de breeze
coaxin it up all de time takin a few steps back
an it did rise up bit by bit till de lang tail
din't touch de groun an we grip de palin
we head squeeze between to watch him
an trace its rise rise rise up up up in de sky
we all want to fly in like bird but can only kite
fly an he step back juss as we beginnin
to smile fo him envy him his easter risin
when bap he let out a scream leggo string
an de kite drop outta de sky like a bird
a sail down to de nex field an we runnin to him
fogetting de kite we uncle dem mek days ago
fram wood shave light as bird bone
paper tin like fedder an de tongue o kite
fo singin in de sky like a bird an de tail
fo balance string in de mout like it pullin
de longess worm an he a hole him foot
an a bawl we could a see seven inch a greenhart
gone in at de heel runnin up him leg
like a vein he groanin all de way to de haspital
on de cross-bar a bike ridden by a uncle
she not sayin a word but we hearin her
fo de ress a dat day an evry year since
doan raise no kite is good friday
an de sky was a birdless kiteless wait fo her word